Vilhjálmur: Þetta er hræðilegt

„Þetta er meira en ég reiknaði með, þetta er alveg hræðilegt," segir Vilhjálmur Egilsson, framkvæmdastjóri Samtaka atvinnulífsins þegar hann er spurður út í stýrivaxtahækkun Seðlabankans.

„Þetta er einn af jarðarfararsálmunum fyrir peningastefnuna og gjaldmiðilinn," segir Vilhjálmur og bætir við að hann vonist til að hækkunin vari ekki lengi.

Hann segist hafa rætt við fulltrúa Alþjóðagjaldeyrissjóðsins um þessi mál að undanförnu. „Auðvitað hefur maður talað við þetta fólk og það lagði áherslu á að það hefðu verið mistök að lækka vextina. Ég hlustaði á þeirra rök fyrir því en ég er bara ekki sammála þeim," segir Vilhjálmur.

Vilhjálmur segir skipta mestu máli að koma genginu í hækkunarferil. „Sá gjaldeyrissjóður sem menn hafa verið að byggja upp skiptir mestu máli í því. Ég held að það sé númer eitt, tvö og þrjú, en ekki hvort vextirnir séu hærri eða lægri. Þessir vextir koma sér mjög illa fyrir fyrirtæki og heimili og skapa mjög mikinn vanda á þeim endanum."

Það eru ákveðnir hlutar af atvinnulífinu sem hafa þurft að nota innlent fjármagn. Síðan þegar aðgangur að erlendu fjármagni hefur lokast þá hefur verið stólað ennþá meira á innlenda fjármagnið. Þegar vextirnir á innlenda fjármagninu eru síðan hækkaðir svona mikið þá eykur það á vandann.