Vilja bregðast við atvinnuleysi með auknu námsframboði

Rektorar sjö íslenskra háskóla sent frá sér sameiginlega yfirlýsingu þar sem þeir segja að bregðast þurfi við erfiðleikum í efnahagslífinu og yfirvofandi atvinnuleysi með fjölþættum aðgerðum á sviði menntamála.

Sérstaklega þurfi að nýta þann kraft og þekkingu sem háskólarnir búa yfir til að efla nýsköpun og skapa ný atvinnutækifæri. Bent er á að stór hluti atvinnulausra verði háskólamenntað fólk og það þurfi að fá tækifæri til að bæta við sína menntun með fjölbreytilegu námsframboði svo það geti gengið tvíeflt til starfa þegar aðstæður batna.

Mikil og stórkostleg tækifæri blasa við Íslendingum og vilja háskólarnir leggjast á eitt með þjóðinni um að þau verði nýtt til uppbyggingar og framþróunar á öllum sviðum atvinnulífs og menningar. Rektorar hvetja stjórnvöld eindregið til að setja virkjun mannauðsins í forgang og móta með háskólunum nýja sókn til velferðar og öflugs samfélags. Framtíð þjóðarinnar byggir á því að hér búi vel menntað og framsækið fólk," segir enn fremur í yfirlýsingu rektoranna.