Vel gengur að manna frístundaheimili borgarinnar

Undanfarna daga og vikur hefur gengið vel að manna frístundaheimili Reykjavíkurborgar. ,,Fyrir tveimur vikum vantaði um 44 starfsmenn og er sú tala nú komin niður í 27," er haft eftir Soffíu Pálsdóttur, skrifstofustjóra hjá ÍTR, á heimasíðu borgarinnar.

Fyrr í vikunni voru 2327 börn komin með vistun eftir skóla á frístundaheimilum Reykjavíkur og 327 börn voru enn á biðlista.

Soffía segir að síðustu daga hafi hlutirnir verið að gerast mjög hratt og búið sé að leysa alla biðlista í Grafarvogi, miðbæ, Hlíðum og Vesturbæ. Aftur á móti virðist ætla að taka lengri tíma að fullmanna frístundaheimili í Grafarholti.

Mánaðarmótin ágúst september voru fleiri grunnskólabörn á biðlista miðað á sama tíma og í fyrra. Rúmlega 1700 börn voru á biðlista eftir plássi á frístundaheimilum og þá vantaði tæplega 200 starfsmenn í hlutastarf.

Þá gekk erfiðlega að ráða starfsfólk á frístundaheimili Reyjavíkurborgar í Vesturbænum. Undanfarin ár hefur gengið einna best að manna frístundaheimili í þeim borgarhluta en aftur á móti hefur reynst erfiðara að ráða starfsfólk í úthverfin.

En staðan er önnur í dag og hafa þær efnahags þrengingar sem landsmenn ganga í gegnum þessar vikurnar eflaust eitthvað um það að segja.