750 börn á biðlistum frístundaheimila - hefur fækkað um 250

Börnum sem bíða eftir plássi á frístundaheimilum borgarinnar hefur fækkað um 250 á síðustu tveimur vikum eftir því sem fram kemur á heimasíðu Íþrótta- og tómstundaráðs.

Þann 11. september voru um þúsund börn á biðlista en þeim hefur nú fækkað í 750. Ríflega tvö þúsund börn eru komin með dvöl á frístundaheimilum ÍTR en alls hafa borist um 2.750 umsóknir um dvöl á heimilunum.

„Meginástæðan fyrir þessum góða árangri er að tekist hefur að ráða fleiri starfsmenn til starfa á frístundaheimilin og gert ráð fyrir að starfsmönnum fjölgi strax í næstu viku. Á allnokkrum frístundaheimilum er búið að taka öll börn inn af biðlistum og gera má ráð fyrir að enn fleiri frístundaheimili losi um biðlistana strax eftir næstu helgi," segir á vefnum.

Allt kapp verður áfram lagt á að leysa mönnunarvanda frístundaheimilanna með það markmið að leiðarljósi að tryggja sem flestum börnum á aldrinum 6-9 ára fjölbreytt frístundastarf.