Ólafur: Guðjón er að bulla

Ólafur Ragnarsson dómari segir ekkert hæft í ásökunum Guðjóns Þórðarsonar í sinn garð né heldur annarra dómara.

Guðjón sagði eftir leik Keflavíkur og ÍA í gær að Ólafur hefði beitt Stefán ofbeldi með því að gefa honum rauða spjaldið. Einnig að dómarar hefðu fundað sérstaklega um ÍA og Stefán Þórðarson.

„Ég svaf bara mjög vel í nótt," sagði Ólafur í samtali við Vísi. „Hann verður bara að fá að hafa sín ummæli út af fyrir sig," bætti hann við. „En hann var bara að bulla þegar hann nefndi þennan fund á nafn," sagði Ólafur og neitaði því að hafa fengið fyrirmæli um að taka Stefán sérstaklega fyrir.

„Að sjálfsögðu ekki," sagði Ólafur og spurður sagðist hann standa heilshugar við spjöldin sem hann gaf Stefáni í gær.

Ólafur segist einnig vera í góðu standi til að sinna dómgæslu. „Ég er í góðu formi eins og aðrir dómarar. Enda dæmir enginn nema að hafa staðist próf hjá KSÍ."

Spurður hvort að Stefán væri búinn að fá aðvörun fyrir síðara spjaldið sem Ólafur gaf honum í gær sagðist hann ekki vilja tjá sig nánar um málið.