Guðjón gæti fengið margra leikja bann

Aga- og úrskurðarnefnd KSÍ er heimilt að úrskurða Guðjón Þórðarson í meira en eins leiks bann.

Guðjón sakaði Ólaf Ragnarsson, dómara leiks Keflavíkur og ÍA í gær, um að beita Stefán Þórðarson ofbeldi með því að gefa honum rauða spjaldið. Einnig sagði hann að dómarar hefðu fundað til að taka ákveða hvernig ætti að taka á Skagamönnum og þá sérstaklega Stefáni Þórðarsyni.

Í reglugerð KSÍ um aga og úrskurðarmál kemur fram að nefndinni er heimilt að úrskurða hvern þann sem framkvæmdarstjóri KSÍ kærir til nefndarinnar í leikbann. Er það mat nefndarinnar hversu marga leikja bann viðkomandi fær og engin takmörk á því.

Greinin, númer 13.9.5 í fyrrnefndri reglugerð, er svohljóðandi:

„Brot skv. tilkynningu framkvæmdastjóra KSÍ sbr. 18. grein hefur í för með sér refsingu eftir eðli brotsins þ.á.m. áminningu, ávítur, sektir að fjárhæð kr. 50.000 og leikbann."

Nefndin getur því annað hvort áminnt eða ávítt Guðjón og sektað að hámarki 50 þúsund króna. Að auki er nefndinni heimilt að dæma Guðjón í leikbann og er það undir henni komið hveru langt bannið verður.

Þórir Hákonarson, framkvæmdarstjóri KSÍ, sagði í samtali við Vísi í morgun að hann muni skjóta ummælum Guðjóns fyrir aganefnd sem fundar næst á morgun. Hún mun líklega fara fram á greinagerð frá Guðjóni og kveða upp úrskurð sinn í næstu viku.