Hálf sjötugur fjöldamorðingi trúlofast tvítugri stúlku

Hálf sjötugur franskur fjöldamorðingi, sem gengur undir nafninu Snákurinn og er grunaður um að hafa myrt að minnsta kosti 20 manns víðsvegar um Asíu, hefur trúlofast tvítugri stúlku frá Nepal þar sem hann situr í fangelsi.

Snákurinn, sem heitir Charles Sobhraj, afplánar nú lífstíðardóm fyrir morð í Nepal. Hann og unnustan unga, Hihita Biswas, segjast ætla að ganga í hjónaband ef hæstiréttur Nepal lætur Sobhraj lausan.

Sobhraj var dæmur fyrir að myrða kanadískan ferðamann í Katmandu árið 1975, en hann flýði þá land og var ekki handtekinn fyrir verknaðinn fyrr en hann sneri aftur til Nepal nærri 30 árum síðar. Í millitíðinni hafði Sobhraj haldið til víða um Asíu og setið í fangelsum í Thailandi og víðar, þar á meðal í nær tuttugu ár í rammgerðu tugthúsi í Delhi á Indlandi vegna þjófnaðarkæru.

Sobhraj er af asísku bergi brotinn en er franskur ríkisborgari. Hann hefur viðurkennt að hafa orðið nokkrum Vesturlandsbúum að aldurtila - en jafnan dregið játningar sínar til baka þegar yfirvöld hafa sest að honum. Lögreglan í Afghanistan, Indlandi, Thailandi, Tyrklandi, Nepal, Íran og Hong Kong gruna hann um morð í sínum umdæmum. Það er þó einvörðungu í Nepal sem hann hefur verið dæmdur fyrir morð - og nú gerir kærastan unga, sem var ritari á skrifstofu lögmanna hans í Katmandu, sér vonir um að hann verði látinn laus vegna skorts á sönnunum og þá geti þau farið til Frakklands og gengið þar í heilagt hjónaband.

Viðurnefni hans, Snákurinn, á rætur að rekja til þess að Sobhraj er slyngur í að dulbúa sig og komast undan yfirvöldum á dularfullan hátt. Hann hefur meðal annars flúið rammgerð fangelsi fyrir framan nefið á fangavörðum.