Ósætti vegna reykinga endaði með hnífsstungu

Þrír menn voru stungnir með hnífi í nótt í veislu í rugbyklúbbi í Kaupmannahöfn þegar einn af þeim bað nokkra af gestunum um að reykja utandyra. Það var um hundrað manna afmælisveisla í fullum gangi í rugbyklúbbnum CSR-Nanok þegar tók að hitna í kolunum.

Samkvæmt Rene Hansen, rannsóknarlögreglumanni hjá Kaupmannarhafnalögreglunni, höfðu sjö til tíu gestir verið til mikilla vandræða. Þeir höfðu ögrað öðrum gestum og egnt til slagsmála. Það var svo um fjögurleytið að staðartíma að einn gesturinn í rugbyklúbbnum bað einn af vandræðagemsunum að reykja utandyra. Það olli svo mikilli reiði að ráðist var á hann og hann stunginn með hnífi. Þegar tveir félagar mannsins hugðust veita honum hjálp voru þeir einnig stungnir.

Mennirnir sem ráðist var á voru stungnir í bakið, magann og lærið. Þeir voru fluttir í skyndingu á Ríkisspítalann þar sem þeir fengu aðhlynningu. Enginn þeirra er í lífshættu. Lögreglan leitar nú þriggja árásarmanna. Þeir eru á aldrinum 20-25 ára gamlir.