Hafa fengið um hundrað ábendingar um hótanir á Netinu

Lögregla í Finnlandi hefur fengið næstum hundrað ábendingar um hótanir á Netinu frá því að ungur maður skaut tíu manns til bana í bænum Kauhajoki á þriðjudag.

Fram kemur á fréttavef finnska ríkisútvarpsins að tilkynnt hafi verið um allt frá athugasemdum á spjallsvæðum til mynda og myndbanda á Netinu. Lögregla segir mikilvægt að almenningur láti vita af öllum hótunum svo hún geti rannsakað hvort eitthvað sé á bak við þær.

Lögreglunni er mikið í mun að standa sig nú enda hefur hún verið harðlega gagnrýnd fyrir það að hafa ekki svipt Matti Saari, manninn sem myrti fólkið í Kauhajoki, skotleyfi eftir að í ljós kom að hann hafði sett myndband af sér með skammbyssu á Netið.