Alltaf vont að missa gott fólk að ósekju

Steinunn Valdís Óskarsdóttir, varaformaður þingflokks Samfylkingarinnar, segir óheppilegt í hvað farveg málefni lögreglunnar á Suðurnesjum eru komin.

Eins og kunnugt er óskaði Jóhann Benediktsson lögreglustjóri eftir því að fá að láta af störfum um næstu mánaðamót og það hafa þrír aðrir lykilstarfsmenn embættisins einnig gert. Jóhann bar við algjörum trúnaðarbresti milli sín og Björns Bjarnasonar dómsmálaráðherra varðandi framtíð lögregluembættisins á Suðurnesjum og þá sakar Eyjólfur Kristjánsson, staðgengill Jóhanns, ráðherrann um einelti gangvart Jóhanni og lögregluembættinu.

Steinunn Valdís segir í samtali við Vísi að óheppilegt sé í hvaða farveg málið sé komið. Hún bendir á að Lúðvík Bergvinsson, þingflokksformaður Samfylkingarinnar, hafi vakið athygli á ýmsum málum sem tengist embættinu og þá segist hún sem nefndarmaður í fjárlaganefnd hafa fengið fulltrúa lögregluembættisins á Suðurnesjum á sinn fund til þess að ræða fjárhag þess. „Ég tel ljóst að þeir hafi ekki mætt þeim skilningi sem maður myndi ætla hjá ráðuneytinu. Samskiptin og málin hafa farið í mjög óheppilegan farveg og það er ekki til þess að auka traust manna," segir Steinunn Valdís. Að öðru leyti verði Björn Bjarnason að svara fyrir sínar gjörðir.

Aðspurð hvort þróun mála muni skaða embættið segir Steinunn að það geri það örugglega tímabundið. „Eyjólfur Kristjánsson, staðgengill Jóhanns, sagði í fréttum í gær að það kæmi maður í manns stað en það er alltaf vont fyrir stofnanir hins opinbera að missa gott fólk algerlega að ósekju," segir Steinunn. Fjórir lykilstarfsmenn á Suðurnesjum hafi sagt upp sem sýni að deilurnar séu ekki bundnar við persónu Jóhanns.

Björn Bjarnason hefur boðað breytingar á lögregluembættinu á Suðurnesjum þar sem skilja á á milli löggæslu, tollgæslu og flugverndar og færa þau mál undir þrjú ráðuneyti. Spurð hvort stuðningur sé við þær breytingar Björns í þingflokki Samfylkingarinnar segist Steinunn ekki hafa fengið kynningu á þeim og því geti hún ekki tekið afstöðu til þeirra.