Athugasemd frá Þorsteini Siglaugssyni

Vegna fréttar Stöðvar 2 af ráðningu Þorsteins Siglaugssonar til ráðgjafarstarfa fyrir Reykjavík Energy Invest vill Þorsteinn koma eftirfarandi á framfæri:

„Undanfarna mánuði hef ég, á vegum fyrirtækis míns, unnið að stefnumótunarverkefnum fyrir Reykjavík Energy Invest (REI) í umboði stjórnar og forstjóra félagsins. Með fréttaflutningi sínum þann 3. og 4. nóvember sl. vegur fréttastofa Stöðvar 2 gróflega að starfsheiðri mínum og orðspori fyrirtækis míns. Slíkt er erfitt að flokka öðruvísi en sem vísvitandi atvinnuróg.

Nánar tiltekið birtist frétt á Stöð 2, mánudaginn 3. nóvember, þar sem tilraun var gerð til að gera störf mín fyrir REI tortryggileg. Voru efnisatriði fréttarinnar tvö. Annars vegar að ástæðan fyrir störfum mínum fyrir félagið væri sú að ég væri náinn vinur Kjartans Magnússonar, borgarfulltrúa og stjórnarformanns REI. Hins vegar að sú stefnumótunarvinna sem ég hef unnið að með stjórninni undanfarna mánuði hefði engum niðurstöðum skilað.

Bæði þessi efnisatriði eru röng. Ég kynntist Kjartani Magnússyni lauslega fyrir tæpum 20 árum þegar við vorum samtíða í Háskóla Íslands og hef stundum átt í samskiptum við hann eftir það, mjög stopult raunar. Eins og margir aðrir hef fylgst með störfum Kjartans í borgarstjórn mörg undanfarin ár og talið sjálfsagt að ljá honum stuðning í prófkjörum, rétt eins og öðrum álitlegum frambjóðendum. Því fer hins vegar fjarri að kunningsskap okkar megi flokka sem "nána vináttu og samstarf", eins og rakalaust er haldið fram í fréttinni, raunar þvert á orð Kjartans sjálfs. Að sjálfsögðu hef ég hins vegar átt talsvert samstarf við Kjartan undanfarna mánuði í tengslum við störf mín fyrir REI, rétt eins og aðra stjórnarmenn og starfsmenn REI og OR sem verkefninu tengjast.

Óskað var eftir þjónustu fyrirtækis míns vegna þessa verkefnis samkvæmt samhljóða samþykkt í stjórn félagsins. Eftir því sem mér hefur skilist var meginástæða þess að leitað var til mín sú, að ég hef áður unnið að verkefnum tengdum orkuiðnaðinum, sérstaklega í tengslum við áhættu- og arðsemismat slíkra verkefna, en hef jafnframt engra hagsmuna að gæta gagnvart orkuiðnaðinum. Raunar hef ég ekki hikað við að setja fram og verja gagnrýna sýn á þau mál á opinberum vettvangi, án minnsta tillits til viðskiptalegra eða pólitískra hagsmuna.

Hvað síðara atriðið varðar hefði fréttamanni Stöðvar 2 nægt að fletta upp fréttum sem birtust síðsumars af þeirri þverpólitísku sátt sem náðst hefur um framtíð REI og felst í því að stefnt skuli að stofnun opins fjárfestingasjóðs sem taki að sér að fjármagna verkefni félagsins. Sú sátt var afrakstur þeirrar umfangsmiklu vinnu sem unnin var á vettvangi stjórnarinnar í sumar með þátttöku fjölmargra aðila innan og utan fyrirtækisins. Við sem að verkinu komum höfum talið það mikilvægan áfanga að ná slíkri sátt um REI í ljósi þess samstöðuleysis sem áður ríkti um framtíð þess, og raunar verið nokkuð stolt af þeim árangri. Vissulega hafði það áhrif á starfsemi og fjármögnunarmöguleika REI, sér í lagi hér innanlands, þegar íslenska bankakerfið hrundi í byrjun síðasta mánaðar. Það breytir þó ekki því, að enn er unnið samkvæmt þeirri stefnu sem lokið var við að marka nú í haust og engin ástæða til að álykta að því máli muni ekki ljúka farsællega.

Fyrirtæki mitt hefur frá stofnun unnið að margs konar ráðgjafarverkefnum fyrir breiðan hóp viðskiptavina. Verkefni fyrir REI eru hluti af þessu starfi og unnin samkvæmt hóflegum taxta eða föstum samningum eins almennt gerist um þjónustu ráðgjafa, lögmanna, endurskoðenda og sambærilegra aðila. Nauðsynlegt er að þetta komi skýrt fram, þar sem í framhaldsfrétt þann 4. nóvember er ranglega gefið til kynna að um launagreiðslur sé að ræða. Ennfremur skal bent á, að þar sem REI hefur fáum starfsmönnum á að skipa reiðir fyrirtækið sig að miklu leyti á aðkeypta þjónustu. Ráðgjafarstörf mín fyrir REI nema litlu broti af því umfangi.

Með því að gefa til kynna, þvert á staðreyndir, að það starf sem fyrirtæki mitt hefur unnið á vegum REI hafi verið tilgangslítið og árangurslaust, er vegið gróflega að starfsheiðri mínum og fyrirtækisins. Þess háttar áburður getur ekki talist annað en atvinnurógur af versta tagi, sem valdið getur verulegum fjárhagslegum skaða á þeim rekstri sem fyrirtækið hefur með höndum. Slík vinnubrögð ástundar enginn fjölmiðill sem vill láta taka sig alvarlega.

REI vinnur nú að þróun áhugaverðra og arðbærra verkefna á erlendri grund. Orkuveita Reykjavíkur er, eðli málsins samkvæmt, merkisberi í þeirri starfsemi sem byggst hefur upp hér á undanförnum árum og snýr að því að selja erlendis þá miklu þekkingu og reynslu af virkjun jarðhita, sem hér er að finna. Þegar að kreppir í efnahagslífinu og framkvæmdum innanlands er slegið á frest er enn mikilvægara en áður að nýta þessa þekkingu til að skapa innlendum fyrirtækjum erlend verkefni og afla þannig gjaldeyris, með lágmarksáhættu, í samræmi við þá mörkuðu stefnu REI og Orkuveitunnar, sem full samstaða hefur náðst um. Það er von mín að ómerkileg og innihaldslaus æsifréttamennska fréttastofu Stöðvar 2 verði ekki til þess að skaða þetta mikilvæga viðfangsefni."