Töluvert um ölvun og áflog á Ísafirði um helgina

Töluvert var um ölvun og áflog á Ísafirði um helgina og tengdist það oftast skemmtistöðum á Ísafirði. Í dagbók lögreglunnar á Vestfjörðum kemur fram að tilkynnt ahfi verið um fjórar líkamsárásir á Ísafirði um helgina og nokkuð var um útköll vegna ölvunar í heimahúsum.

Þá urðu tvö vinnuslys og eitt slys í heimahúsi á Vestfjörðum í liðinni viku. Á mánudaginn datt maður ofan af gámi á vinnusvæði á Ísafirði og var hann fluttur á sjúkrahús með áverka á fæti. Á þriðjudaginn féll kona á heimili sínu á Hólmavík og var talið að hún væri beinbrotin. Hún var flutt með þyrlu Landhelgisgæslunnar á sjúkrahús í Reykjavík.

Þá slasaðist maður um borð í báti þar sem hann var að veiðum fyrir utan Vestfirði. Bátnum var siglt til hafnar á Þingeyri og var manninum komið þaðan á sjúkrahús með áverka á fæti.