Frestur í Icesave málinu rennur út á miðnætti

Íslensk stjórnvöld hafa til miðnættis að leysa deiluna við Breta um Icesave-reikningana. Lausn mun í burðarliðnum, breska ríkið mun reiða fram jafnvirði rösklega 600 milljarða króna til að borga þeim sem áttu fé inn á Icesave-reikningum Landsbankans.

Það er ekki ofmælt að þjóðin hafi verið illa upplýst um Icesave-deiluna. Ráðamenn hafa lengst af fullyrt að lán frá Alþjóðagjaldeyrissjóðnum sé algerlega ótengt Icesave-deilunni. Fyrir viku sagði forsætisráðherra orðrétt: við munum ekki láta kúga okkur til að blanda þessum tveimur málum saman. Nú er ljóst að það er rangt.

Þingflokkar Samfylkingar og Sjálfstæðisflokks voru kallaðir saman í gærkvöldi. Þar kom fram, samkvæmt heimildum fréttastofu, að búið væri að loka öllum dyrum á Ísland. Ef við leystum ekki Icesave-deiluna fengi íslenska ríkið ekkert af þeim lánum sem leitað hefur verið eftir - ekki einu sinni frá Norðurlöndunum.

En um hvað snerist deilan? Jú, að íslenska ríkið taldi að sér bæri ekki að greiða meira en það sem til er í tryggingasjóði innistæðueigenda. Það er um 3% af þeim 600 milljörðum sem ríkinu ber að greiða. Sú röksemd féll hvergi í kramið utan landsteinanna.

Og nú liggur fyrir samkvæmt heimildum fréttastofu að brátt dragi til tíðinda, enda hafi íslensk stjórnvöld aðeins frest til miðnættis að leggja fram lausn. Hún mun felast í því að Bretar greiði breskum sparifjáreigendum tryggingu upp að hámarki rúmar 20 þúsund evrur, skyldutryggingu samkvæmt EES reglum. Íslenska ríkið ábyrgist að greiða upphæðina til baka og fær eignir Landsbankans í Bretlandi og getur farið að koma þeim í verð. Talið er að sala á þeim dugi nánast til að greiða upplánið frá Bretum.

Því bendir allt til þess að skellurinn á íslenska skattborgara verði fjarri því eins harkalegur og umræða síðustu vikna hefur gefið tilefni til að halda.

Fréttastofa reyndi að fá viðtal við forsætisráðherra, breska sendiherrann á Íslandi og formann skilanefndar Landsbankans, við vinnslu þessarar fréttar, án árangurs. Einnig sendi fréttastofa skilanefndinni ítarlegan spurningalista. Engin svör bárust.

Forsætisráðuneytið sendi frá sér yfirlýsingu nú síðdegis og ítrekar að innistæðueigendur hér þurfi ekki að óttast um fé sitt í íslenskum bönkum. Þær innistæður sé að fullu tryggðar.