Vonir standa til að Icesave samkomulag náist í dag

Samkomulag við Evrópusambandið varðandi Icesave reikninga er nánast í höfn og standa vonir til þess að hægt verði að opinbera það í dag. Heimilir Vísis herma að samningaviðræðum sé lokið og nú sé verið að fínpússa samninginn. Sömu heimildir herma þó að ekki sé hægt að fullyrða neitt um að samkomulagið verði handsalað í dag heldur gæti það verið á morgun. Hins vegar standi vonir manna til þess að klára málið sem fyrst.

Bretar og Hollendingar hafa deilt við Íslendinga um það hvernig standa skuli að greiðslum af Icesave reikningunum en Evrópusambandið hefur tekið að sér samningagerðina við Íslendinga fyrir hönd landanna tveggja. Talið er að tryggðar innistæður á Icesave reikningum nemi rúmlega 600 milljörðum króna.

Í gærkvöldi tilkynnti Alþjóðagjaldeyrissjóðurinn að lán Íslendinga hjá sjóðnum verði afgreitt í framkvæmdastjórn sjóðsins á miðvikudaginn kemur. Það þykir benda til að Evrópusambandið telji samkomulag í höfn varðandi Icesave.