Rússland og Venesúela í kjarnorkusamstarf

Hugo Chavez, forseti Venesúela, lýsti því yfir í gær að hann væri áhugasamur um að taka upp samstarf við Rússa um kjarnorkuvinnslu til rafmagnsframleiðslu. Þetta kom fram í ávarpi Chavez á samkomu í Caracas, höfuðborg Venesúela, í gær.

Chavez er nýkominn frá Rússlandi þar sem hann fundaði með Vladimir Pútín forsætisráðherra og Dmitri Medvedev forseta. „Við höfum vissulega áhuga á að taka upp kjarnorkuvinnslu í friðsamlegum tilgangi, bæði læknisfræðilegum og til orkuframleiðslu," sagði Chavez og benti á að slík starfsemi væri þegar í gangi í Argentínu og Brasilíu.

Pútín lét þau ummæli falla á föstudaginn að þeir Chavez hefðu rætt um ný tækifæri til samvinnu milli þjóðanna tveggja. Þá greindi fréttastofan Interfax frá því að Rússar hefðu gefið Chavez vilyrði fyrir eins milljarðs dala reikningsúttekt á vopnum til að þróa hernaðarleg tengsl ríkjanna.

CNN greindi frá þessu.