Fjölda iðnaðarmanna sagt upp í gær

Byggingarfélag Gunnars og Gylfa sagði upp 20 starfsmönnum um þessi mánaðarmót. „Ég held að það hafi verið í kringum 20 manns," segir Gunnar Þorláksson, annar stofnenda BYGG. Hann útilokar ekki frekari uppsagnir og segir grafalvarlegt ástand á atvinnumarkaði. „Við erum virkilega að vanda okkur í því að halda í okkar fólk," segir Gunnar.

Gunnar bendir á að sumir af þeim starfsmönnum sem hafi verið sagt upp séu starfsmenn til margra ára. Gunnar tekur þó fram að enginn starfsmaður sé farinn og ef rofi til í efnahagsástandinu verði uppsagnir dregnar til baka.

Þá sagði byggingarfélagið Mótás upp 16 manns í gær. Bergþór Jónsson, framkvæmdastjóri Mótás, sagði að um varúðarráðstafanir væri að ræða. Verkefnaskortur blasti við núna, en uppsagnirnar yrðu dregnar til baka ef efnahagsástandið batni.