Mun gera allt til að bjarga breskum mörkuðum

Breski forsætisráðherrann Gordon Brown segist grípa til allra ráða sem þurfi til að halda breskum fjármálamörkuðum á réttum kili eftir að Bandaríkjaþing hafnaði björgunarsjóðnum.

Þetta kom fram í neyðaryfirlýsingu forsætisráðherrans í gær eftir að fregnir bárust af afstöðu bandaríska þingsins. Brown sagði umfangsmiklar ráðstafanir þegar hafa verið gerðar til að halda stöðugleika á mörkuðunum en áður hafði hann látið í veðri vaka að hann myndi ekki grípa til neinna aðgerða fyrr en ljóst yrði hvort afstaða bandaríska þingsins kæmi harkalega niður á fjármálamörkuðum Bretlands.

Það leið þá ekki á löngu uns mikil lækkunarhrina fór af stað og viðurkenndi Brown í ávarpi sínu að mörkuðunum væri vissulega ógnað. Hann lagði áherslu á að sérstaklega yrði reynt að tryggja fjárhagslegt öryggi einstaklinga og fjölskyldna en búist er við að Financial Times Stock Exchange-vísitalan breska taki myndarlega dýfu í dag. Gordon Brown hefur sent Hvíta húsinu skeyti þar sem hann hvetur Bush til að grípa til þeirra aðgerða sem duga megi til að bjarga því sem bjargað verður.