Bilun í Hubble frestar leiðangri fram á 2009

Leiðangur geimfara að Hubble-sjónaukanum, sem skjóta átti af stað með geimferjunni Atlantis eftir hálfan mánuð, hefur verið settur á ís fram á næsta ár eftir að óvænt bilun kom upp í sjónaukanum um helgina. Hann hætti að senda myndir til jarðar í kjölfarið.

Ástæða frestunarinnar er sú að þjálfa þarf leiðangursmennina til að kljást við þá bilun sem nú er komin upp en ætlunin var að gera allt annað í leiðangrinum. Þá þarf að útvega og senda með leiðangrinum varahluti vegna nýju bilunarinnar en ekki er hlaupið að því þar sem byrja þarf á því að prófa varahlutina á jörðu niðri og veita þeim vottun um að verkun þeirra sé sem skyldi. Flestir varahlutir í sjónaukann eru frá því á 9. áratugnum eins og hann sjálfur.

Vararásir síðast í notkun 1990

Geimfararnir sem ætlunin var að senda til Hubble um miðjan október hafa þjálfað sleitulaust í tvö ár fyrir þær fimm geimgöngur sem áætlað var að fara í leiðangrinum. Í hverri þeirra átti að framkvæma ákveðnar viðgerðir og viðhaldsverkefni sem allt er nákvæmlega kortlagt í verklýsingu. Sú bilun sem nú er komin upp krefst þess að ný verkáætlun sé gerð og það tekur einnig tímann sinn.

Nú er unnið að því að fá sjónaukann til að skipta yfir á vararás svo hægt sé að nálgast myndefni frá honum áfram. Að sjálfsögðu er þetta einnig flókið verkefni þar sem vararásirnar hafa ekki verið í notkun síðan á árunum í kringum 1990.

Næsta áætlaða geimskot er því ferð Endeavour til alþjóðlegu geimstöðvarinnar í nóvember.