Fyrrverandi ástkona McCains dúkkar upp í Brasilíu

Sjötíu og sjö ára kona í Brasilíu hefur komist í kastljós fjölmiðla þar í landi eftir að upp komst að hún hefði átt í ástarsambandi við John McCain, forsetaframbjóðanda repúblikana í Bandaríkjunum.

Maria Gracinda Teixeira, fyrrverandi ballerína og fyrirsæta, vann í Rio de Janeiro árið 1957 en þangað lagði McCain leið sína sem sjóliði á herskipinu USS Hunt. Eftir því sem Teixeira segir í samtali við brasilíska miðilinn Extra kynntust þau við höfnina þangað sem hún lagði leið sína til þess að snæða morgunverð. Ástir tókust með sjóliðanum unga og ballerínunni og fór svo að McCain gerði sér ferðir til að heimsækja hana í Brasilíu. Hins vegar kulnaði ástin smám saman, meðal annars ungæðislegrar óþolinmæði eins og það er orðað.

McCain hafði reyndar ljóstrað því upp í bók árið 1999 að hann hefði átt í sambandi við brasilíska mey en gaf ekki upp nafn hennar. Það var ekki fyrr en í aðdraganda forsetakosninganna í Bandaríkjunum sem brasilískir blaðamenn lögðust í rannsóknarvinnu og höfðu upp á hinni 77 ára gömlu fyrrverandi ástkonu.