Hagræðir og ræður tugi lögreglumanna

Lögreglustjórinn á höfuðborgarsvæðinu hefur auglýst eftir tuttugu og þremur lögreglumönnum til starfa. Mikil hagræðingarvinna hefur farið fram innan embættisins og þrátt fyrir aukinn kostnað, svo og niðurskurð telur hann að dæmið muni ganga upp. Á fimmta tug umsókna hafa borist. Umsóknarfrestur rennur út á Þorláksmessu.

Umsóknirnar sem borist hafa eru bæði frá nýútskrifuðum lögreglumönnum svo og þeim sem hafa hug á að snúa aftur til starfa á höfuðborgarsvæðinu, að sögn Stefáns Eiríkssonar lögreglustjóra.

„Við miðuðum við þær forsendur sem við okkur blasa í fjárlagafrumvarpinu og gerðum okkur grein fyrir því að við þyrftum að skera niður samkvæmt fyrirliggjandi kröfum, svo og út af hallarekstri á þessu ári,“ útskýrir hann. „Það gerum við meðal annars með því að loka afgreiðslu okkar í Borgartúni og flytja leyfamálin, það er afgreiðslu vegabréfa, ökuskírteina og þess háttar, yfir til sýslumannsins í Kópavogi. Það sparar okkur 10-20 milljónir.“

Þá verða gerðar breytingar á fyrirkallsdeildinni, einnig í hagræðingarskyni, að sögn Stefáns. Hún verður lögð niður í núverandi mynd. Starfsmenn og verkefnin færast inn á svæðisstöðvarnar og í almennu deildina. Þar sparast einnig tugir milljóna.

„Síðan erum við að hagræða í launamálunum með því að lækka föst kjör yfirmanna og allra sem eru á einhvers konar fastlaunasamningum, um allt að fimm yfirvinnutíma á mánuði. Einnig að draga úr yfirvinnu almennt séð um sama tímafjölda. Það skilar einnig hagræðingu á ársgrundvelli upp á 70 til 80 milljónir.

Með þessu móti getum við ráðið inn í þessar rúmlega tutt-ugu stöður um áramótin.“

Stefán segir rekstur lögreglunnar ekkert sérlega auðveldan á þessum erfiðu tímum.

„Það er auðvitað ekki séð hver endanleg niðurstaða verður hjá okkur. Við erum ekki komnir með tryggingu fyrir að við getum ráðið allt þetta fólk. En ef við fáum viðurkenningu á fjáraukalögum á þeim aukna kostnaði sem við höfum orðið fyrir á þessu ári, bæði vegna verðlagshækkana og viðbúnaðar vegna náttúruhamfara, mótmælaaðgerða og fleira, þá ætti þetta að smella.“ jss@frettabladid.is