Krabbameinsfélagið fær veglega gjöf

Lyfjafyrirtækið Roche hefur ákveðið að styrkja söfnunarátak Krabbameinsfélags Íslands, bleiku slaufuna, með kr. 500.000. Styrkurinn fer til greiðslu á nýjum, stafrænum tækjabúnaði Leitarstöðvarinnar, sem auka mun líkurnar á því að brjóstakrabbamein greinist snemma. „Því fyrr sem brjóstakrabbamein greinist þeim mun meiri eru lífslíkurnar," segir í tilkynningu frá Roche og Krabbameinsfélaginu.

„Roche hefur styrkt Krabbameinsfélagið árlega með ýmsum hætti. Í ár fer andvirði söfnunarátaksins til að greiða fyrir nýju leitartækin, en Roche hefur ávallt lagt áherslu á að leggja sitt af mörkum til samfélagsins og gefið rausnarlega til vísindarannsókna og góðgerðarmála," segir Valdís Beck, markaðsfulltrúi hjá Roche, en í yfir 110 ár hefur fyrirtækið einbeitt sér að nýsköpun, þróun, framleiðslu og markaðssetningu lyfja og greiningarvara.

Roche er eitt af leiðandi fyrirtækjunum á sviði krabbameinslyfja, þar á meðal eru líftæknilyf við brjóstakrabbameini.

Í tilkynningunni segir að þessi líftæknilyf séu mótefni sem bindast og hlutleysa ákveðin prótein sem gegna hlutverki í þróun brjóstakrabbameins. „Sum líftæknilyf eru einnig talin virkja ónæmiskerfi einstaklingsins í baráttunni við brjóstakrabbamein."

„Við erum mjög ánægð með að fá þennan styrk frá Roche og kunnum vel að meta stuðninginn. Baráttan gegn brjóstakrabbameini er barátta okkar allra, og vinnst með öflugu samstarfi margra ólíkra þátta, hvort sem það eru vísindarannsóknir, árveknisátök, bætt leit að krabbameini á byrjunarstigi, ný lyf og tækni við meðferð eða stuðningshópar sjúklinga," segir Guðrún Agnarsdóttir, forstjóri Krabbameinsfélags Íslands.

„Framfarir í þróun og framleiðslu lyfja sem geta læknað eða komið í veg fyrir krabbamein er veigamikill þáttur í baráttunni gegn þessum algenga sjúkdómi. Sala bleiku slaufunnar hefur gengið vonum framar í ár og erum við afar þakklát og stolt yfir því hvernig þjóðin öll hefur stutt okkur og staðið saman," segir Guðrún að lokum.