Varað við nýrri tegund Nígeríubréfa

Embætti ríkislögreglustjóra varar við nýrri tegund svokallaðra Nígeríubréfa sem berast fólki í tölvupósti.

Í tilkynningu frá lögreglu kemur fram að í bréfinu, sem borist hefur nokkrum aðilum hér á landi, kveðst sendandinn vera endurskoðandi við PRIME BANK í London. Hann segist leita eftir samstarfi við heiðarlegan aðila í því skyni að flytja úr landi rúmar 8,5 milljónir sterlingspund. Því er heitið að upphæðinni verði skipt til helminga. Lögregla ítrekar að á bak við Nígeríubréfin standi óprúttnir aðilar sem svífist einskis. Því miður hafi margir Íslendingar látið glepjast og fjárhagslegt tjón þeirra er umtalsvert.

„Svikahrapparnir beita ýmsum brögðum og velþekkt er brella þeirra sem þykjast vera fulltrúar erlendra ríkisstjórna. Gjarnan eru sendar tilkynningar þar sem fólki er lofað ótrúlegustu hlutum. Dæmi um það er að upplýsa fólk um að þess bíði vænn arfur. Svikahrapparnir notast einkum við tölvupóst en talið er að 1 prósent viðtakenda láti blekkjast. Til að koma málum af stað er viðkomandi fenginn til að leggja fram ákveðna upphæð sem vindur stöðugt upp á sig. Sífellt þarf að bæta við upphæðina svo arfurinn, eða hvað það nú er, geti komist í réttar hendur. Stöðugt eru færðar fram nýjar afsakanir til að hafa enn meira fé af hinum hrekklausu," segir ríkislögreglustjóri.

Þá segir lögregla að einnig sé algengt að happdrættisvinningar séu nýttir í blekkingarskyni. Viðtakandi fær þá tilkynningu um að hann hafi hlotið vinning. Síðar er viðtakanda greint frá því að hann þurfi að leggja fram tiltekna upphæð áður en vinningurinn verði greiddur út. Málið vindur síðan upp á sig og stöðugt er leitast við að hafa meira fé af fórnarlambinu.

Varað við tölvubréfum með morðhótunum

Áður hefur Ríkislögreglustjórinn varað við svikahröppum er senda einstaklingum tölvubréf sem innihalda morðhótanir frá leigumorðingja. Þar er á ferðinni ný tegund ruslpósts sem kallast "hit man scam" eða "killer spam". Þessi tegund tölvupósts er ein tegund svindls sem kennd er við grein "419" en það er ákvæði í nígerískum hegningarlögum er varðar fjársvik. Alríkislögreglan í Bandaríkjunum FBI og New Scotland Yard í Bretlandi hafa fengið margar kvartanir frá fólki vegna þessara sendinga.

„Í tölvupóstinum kemur fram að greiði viðtakandi tiltekna upphæð inn á bankareikninga erlendis þá verði lífi viðkomandi þyrmt. Svikahrapparnir beita ýmsum brögðum og er nýleg aðferð þeirra að senda tölvupóst í nafni erlendra lögreglustofnana eins og FBI. Þar kemur fram að nafn viðtakanda hafi fundist í fórum handtekins leigumorðingja sem myrt hafi einstaklinga í Bandaríkjunum og Bretlandi. Fórnarlömbin hafi ekki greitt þá upphæð sem krafist var fyrir að þyrma lífi þeirra. Er viðtakandi beðinn um að svara tölvupóstinum til að hjálpa til við frekari rannsókn málsins," segir lögregla.

Almenningi er bent á að leita til lögreglu berist sambærilegur póstur og lýst er hér að framan.