Pósthússtræti lokað annan daginn í röð vegna blíðviðris

Annan daginn í röð er Pósthússtræti lokað fyrir bílaumferð vegna veðurblíðu. Tilgangur lokunarinnar er að gera Austurvöll þægilegri fyrir gangandi gesti og hjólreiðafólk. Heimilt er að gefa þessum hópum meira rými meðfram Austurvelli á góðviðrisdögum.

,,Strax í hádeginu í dag mátti sjá góð áhrif lokunar Pósthússtrætis. Hljómsveit stillti upp græjunum og lék fyrir gesti og gangandi og fjölskyldur mæltu sér mót á Austurvelli. Hugmyndin um lokum kom fram í samráði við borgarbúa. Veitingamenn sem rætt var við í hádeginu voru ánægðir með framtakið og hafa komið fyrir útistólum og borðum á götunni," segir í tilkynningu frá umhverfis- og samgöngusviði Reykjavíkurborgar.