Einhverjir hörðustu tímar í íslenskri flugsögu

Aldrei hefur jafnmörgum flugmönnum hér á landi verið sagt upp í einu vetfangi líkt og átt hefur sér stað að undanförnu hjá Icelandair. Í fréttabréfi Félags íslenskra atvinnuflugmanna kemur fram að félaginu teljist til að 112 flugmenn horfi fram á atvinnumissi til lengri eða skemmri tíma, en það er rúmlega þriðjungur af flugmönnum á starfsaldurslista félagsins.

„Fyrstu uppsagnirnar tóku gildi strax í byrjun september og halda áfram fram eftir vetri. Segja má að alls séu 169 stöðugildi í uppsögn hjá félaginu þar sem 57 flugstjórar munu taka sæti flugmanns í vetur. Í lok júní sl. tilkynnti félagið um uppsagnir 88 flugmanna. Í ágúst var 24 flugmönnum til viðbótar sagt upp störfum.

Í sama bréfi er þó bent á að verkefnastaða annarra íslenskra flugfélaga sé ekki jafnsveiflukennd og hjá Icelandair. Fréttir hafi borist af ráðningum hjá Air Atlanta að undanförnu en Flugfélag Íslands hafi sagt upp 15 flugmönnum nýverið. Sextíu flugmenn munu starfa hjá félaginu í vetur. Þá hefur Flugfélagið Ernir fækkað um fjóra flugmenn miðað við það sem mest var í sumar, þar af er einn fastráðinn.