Jóhanna: Málefni fatlaðra í forgangi

Jóhanna Sigurðardóttir, félagsmálaráðherra, segir málefni fatlaðra vera í forgangi hjá sér. ,,Málefni fatlaðra hafa verið í forgang hjá mér og þannig verður það áfram. Stoðþjónustan hefur verið efld og á milli 800 og 900 milljónir voru settar aukalega í málaflokkinn," segir Jóhanna.

Foreldrar og fagaðilar hafa undanfarið gagnrýnt yfirvöld fyrir úrræðaleysi í málaflokknum og segja mikinn skort vera á úrræðum varðandi búsetu og atvinnu á Suðurnesjum.

Jóhanna segir að með tilkomu nýrrar skammtímavistunar verði vandi barna á Suðurnesjum leystur sem nú þegar hafa ekki þjónustu. Ekki er búið að taka ákvörðun um staðsetningu skammtímavistunarinnar.

Þrátt fyrir erfiðleika í efnahagslífinu og hugsanlegar aðhaldsaðgerðir stjórnvalda segir Jóhanna að hún muni reyna að tryggja að þjónustan skerðist ekki heldur verði þvert á móti efld.

Fyrirhugað er að málefni fatlaðra færist yfir til sveitarfélaganna árið 2011. ,,Erfiðasti hluti tilfærslunnar eru fjármagnsflutningar til sveitarfélaganna," segir Jóhanna og bætir við að hún sé sannfærð um að breytingin muni skila sér í betri þjónustu fyrir fatlaða og aðstandendur þeirra.