Hafnar alfarið að þjónusta við fatlaða sé verri á Suðurnesjum

,,Ég hafna alfarið að þjónusta okkar sé lakari á Suðurnesjum heldur en á höfuðborgarsvæðinu," segir Sigríður Kristjánsdóttir, framkvæmdastjóri Svæðisskrifstofu málefna fatlaðra á Reykjanesi.

Foreldrar og fagaðilar hafa undanfarið gagnrýnt yfirvöld fyrir úrræðaleysi í málaflokknum og segja mikinn skort vera á úrræðum varðandi búsetu og atvinnu á Suðurnesjum.

Örfáir einstaklingar á biðlista vegna búsetu

Sigríður segir reynslu Svæðisskrifstofunnar sýna að fjöldi umsókna um búsetuþjónustu til handa börnum endurspegli ekki ávallt þörf fyrir búsetuúrræðin þar sem foreldrar sæki gjarnan um búsetuna nokkrum árum áður en þeir óski þess að slík þjónusta komi til framkvæmda. Hún bætir jafnframt við að einstaklingarnir séu ,,örfáir sem bíða eftir búsetu nú þegar á Suðurnesjum."

Svæðisskrifstofa málefna fatlaðra á Reykjanesi vinnur að málefnum fatlaðra í gamla Reykjaneskjördæminu sem inniheldur meðal annars sveitarfélögin á Reykjanesi og á höfuðborgarsvæðinu að undanskilinni Reykjavík.

Líklega verður næst byggt í Kópavogi

,,Til þess að við getum ráðist í verkefni verða að liggja fyrir umsóknir," segir Sigríður og bætir við að Svæðisskrifstofan vinni út frá þeim upplýsingum og umsóknum sem hún hafi hverju sinni.

Á starfsáætlun Svæðisskrifstofunnar fyrir 2008 til 2010 eru skammtímavistun og áfangaheimili fyrir fötluð börn. Ekki er búið að taka ákvörðun um staðsetningu. Sigríður segir að á Suðurnesjum sé nú þegar skammtímavistun og miðað við íbúafjölda er að hennar mati eðlilegt að næsta skammtímavistun verði reist í stærri bæjarfélögum í nágrenni Reykjavíkur. Sigríður segir líklegt að Kópavogur verði fyrir valinu.

Varðandi atvinnuúrræði segir Sigíður að ekki megi gleyma að sveitarfélögin hafi einnig skyldum að gegna sem hún segir Svæðisskrifstofuna eiga í góðri samvinnu við. ,,Ég veit ekki betur en að þau hafi verið að standa sig prýðilega."