Íslenskar fjármálastofnanir voru fulldjarfar

Illugi Gunnarsson þingmaður Sjálfstæðisflokksins segir að vel megi segja að stjórnendur íslenskra fjármálastofnana hafa verið fulldjarfir. Í Financial Times í gær er því haldið fram að niðursveifluna nú megi meðal annars rekja til vanþekkingar íslenskra bankamanna á nútíma bankaviðskiptum.

Greinin er skrifuð af Robert Wade, prófessor við London School of Economics. Wade, sem nýverið hélt fyirirlestur hér landi, fer í grein sinni yfir þróun efnahagsmála á Íslandi undanafarin ár.

Wade bendir á að síðastliðinum árum hafi viðskiptahallinn stóraukist og í lok síðasta árs hafi skammtímaskuldir verið 15 sinnum meiri en gjaldeyrisforði Seðlabankans.

Wade rekur þennan mikla halla til einkavæðingar bankanna og hvernig þeim var komið í hendur flokkshollra aðila sem hafi ekki búið yfir nægilegri þekkingu á nútíma bankaviðskiptum. Bankarnir hafi síðan hagað sér eins og vogunarsjóðir og stækkað fyrir tilstuðlan erlendra lána.

Illugi Gunnarsson, þingmaður Sjálfstæðisflokks, segir að hluta til megi rökstyðja þá skoðun að bankarnir hafi tekið of miklar áhættur.

"Ég held að það módel sem að íslensku bankarnir byggðu á, annars vegar þessi samruni á fjárfestingarbanka rekstri og hins vegar viðskiptabönkun og hvernig það var látið vinna saman. það má vel rökstyðja þá skoðun að það hafi leitt til þess að menn hafi gengi full hratt um gleðinnar dyr og verið full djarfir og tekið of miklar áhættur.

En menn mega ekki horfa frá því að það er margt ágætt og gott sem bankarnir hafa gert. bæði fyrir íslenskt viðskiptalílf og fyrir íslenskan almenning," segir Illugi.

Illugi segir að einkavæðingin hafi hins vegar sannað sig.

"Auðvitað geta menn deilt eftir á hvernig staðið var að einkavæðingu bankanna. Sjálfsagt að skoða það vel. Niðurstaðan er sú að það spratt upp hér alveg gríðarlega sterkur fjármálaiðnaður sem að menn höfðu lengi horft eftir. Það vantaði á Íslandi auðvitað miklu öflugri bankastofnanir og bankastofnanir sem voru lausar við pólitíska stýringu. Það var tilgangur einkavæðingarinnar fyrst og fremst," segir Illugi.