Borgin vill semja við SÁÁ

Velferðarráð Reykjavíkurborgar vill semja við SÁÁ um rekstur búsetuúrræðis með félagslegum stuðningi.

Velferðarráð ákvað 27. ágúst að slíta samningaviðræðum við Heilsuverndarstöðina um rekstur áfangaheimilis í Norðlingaholti. í framhaldinu voru teknar upp að nýju viðræður við SÁÁ, Ekron og Samhjálp um rekstur áfangaheimilisins.

,,Það er aukafundur í velferðarráði á morgun og þar verður málið tekið fyrir og ég vonast til að tillagan verði samþykkt samkvæmt fyrirliggjandi samningsdrögum," segir Jórunn Frímannsdóttir formaður velferðarráðs.

SÁÁ og Vinstri grænir gagnrýndu í byrjun sumars þá ákvörðun velferðarráðs að ganga til samninga við Heilsuverndarstöðina þar sem tilboð SÁÁ var lægra. Við val á samstarfsaðila hafði talsverð áhrif að Heilsuverndarstöðin hafði til taks hentugt húsnæði fyrir umrædda starfsemi. Svo reyndist ekki vera þegar á reyndi.

Allt lítur út fyrir að málinu fari senn að ljúka og áfangaheimilið hefji starfsemi sína innan skamms. SÁÁ hefur til umráða bráðabirgðahúsnæði fyrir reksturinn og hugsanlega verður heimilið opnað í lok nóvember.