Fyrsti kossinn

Samstarf Hönnu Birnu Kristjánsdóttur og Óskars Bergssonar var innsiglað með kossi í Ráðhúsinu í kvöld.

Eins og vart hefur farið framhjá mönnum rann samstarf Sjálfstæðisflokks og Ólafs F Magnússonar út í sandinn í morgun, og við tók logandi leit að eftirmanni hans. Það var svo að eigin sögn upp úr hádegi sem þau Hanna Birna og Óskar ræddu fyrst saman símleiðis.

Það gerðu þau svo áfram í allan dag, og hefur eflaust verið farið að hlakka til að hittast í eigin persónu og hefja formlegri viðræður. Gleðin yfir fundinum leyndi sér í það minnsta ekki í augum Hönnu þegar hún heilsaði Óskari kumpánalega og smellti á hann rembingskossi.