45 teknir í Vesturbænum í dag

Brot 45 ökumanna voru mynduð á Neshaga í vesturbæ Reykjavíkur í dag. Fylgst var með ökutækjum sem var ekið Neshaga í vesturátt við Melaskóla.

Á einni klukkustund fyrir hádegi fóru 128 ökutæki þessa akstursleið og því ók rúmlega þriðjungur ökumanna eða 35% of hratt eða yfir afskiptahraða.

Meðalhraði hinna brotlegu var tæplega 44 kílómetra á klukkstund en svæðinu er 30 kílómetra hámarkshraði. Fimm óku á 50 kílómetra hraða eða meira en sá sem hraðast ók mældist á 58. Á þessum stað á Neshaga eru bæði merktar gangbrautir og hraðahindranir.

Vöktun lögreglunnar á Neshaga, en við hann er fyrrnefndur Melaskóli, er liður í eftirliti með hraðakstri við grunnskóla á höfuðborgarsvæðinu.