Neyðarástand að skapast á Landspítala

„Það er uppnám á Landspítala og þar er að skapast neyðarástand," segir Siv Friðleifsdóttir, fyrrverandi heilbrigðisráðherra og þingflokksformaður Framsóknarflokksins. Siv sagði í hádegisviðtalinu á Stöð 2, að þegar að um 100 hjúkrunarfræðingar hætti störfum í dag muni allar skurðaðgerðir leggjast af. Aðeins verði framkvæmdar neyðaraðgerðir.

Siv er málshefjandi í utandagskrárumræðu á Alþingi í dag. Þar hyggst hún spyrja Guðlaug Þór Þórðarson heilbrigðisráðherra að því hvernig hann hyggist taka á því neyðarástandi sem mun skapast við brotthvarf hjúkrunarfræðinga. Siv segir að ráðherra geti ekki komið ábyrgðinni yfir á stjórnendur spítalans. Hann verði að koma með yfirlýsingu um það að komið verði til móts við vilja hjúkrunarfræðinga.

„Menn verða bara að setjast niður og semja um þetta mál. Menn geta ekki unað við það að Landspítalinn lamist," segir Siv. Aðspurð að því hvað Siv myndi sjálf gera í stöðunni sagðist hún ekki geta sagt hver lausnin á málinu væri. „Ég hef ekki upplýsingar til þess," sagði Siv.