Héldu ræður á japönsku

Hin árlega ræðukeppni sendiráðs Japans og Háskóla Íslands var haldin í háskólanum fyrir skömmu. Það er ekki á allra færi að taka þátt því ræðumenn verða að gera grein fyrir máli sínu á japönsku. „Þetta er gert til að hvetja nemendur í japönsku áfram og gefa þeim færi á að heyra í öðrum nemendum tjá sig á tungumálinu," segir Tomoko Daimaru frá japanska sendiráðinu.

Keppt var í þremur flokkum en í þeim fyrsta voru framhaldsskólanemendur, í þeim næsta háskólanemendur sem hafa stundað japönsku í eitt ár og í þeim síðasta þeir sem numið hafa málið í tvö ár.

Finnur Trausti Finnbogason bar sigur úr býtum í fyrsta flokki, Niklas Kullström í öðrum og Ólafur Ágúst Sigurðsson í þeim þriðja. Hörður Mar Tómasson hlaut svo sérstök verðlaun fyrir sína frammistöðu og fékk hann í verðlaun ferð til Kaupmannahafnar þar sem hann mun þreyta alþjóðlegt próf í japönsku.