Pelosi kemur í veg fyrir kosningu um olíuborun

Nancy Pelosi, forseti fulltrúadeildar Bandaríkjaþings notar vald sitt til þess að koma í veg fyrir kosningu um hvort létta eigi banninu við olíuboranir við strendur Bandaríkjanna. Hefur þetta valdið mikilli óánægju meðal Repúblikana sem hafa þrýst á þingið í margar vikur að létta banninu.

Ekki má bora við strendur Bandaríkjanna nema bæði þingið og forseti landsins létti banninu. George Bush Bandaríkjaforseti hefur þegar sagst ætla að létta banninu. Hann hefur skorað á þingið nær daglega að gera slíkt hið sama.

Eru sumir Demókratar orðnir uggandi yfir því að sé banninu ekki létt þá eigi það eftir að koma niður á Demókrataflokknum. Pelosi, sem hefur verið á móti því að bora við strendur Bandaríkjanna í tvo áratugi, telur hins vegar að olíuverð í Bandaríkjunum myndi ekki lækka í kjölfar olíuborunar við strendur landsins. Pelosi vill leita umhverfisvænni leiða til þess að sporna við háu eldsneytisverði.

Nýlega var gerð könnun á meðal Kaliforníubúa hvort þeir væru með eða á móti banninu og var naumur meirihluti þeirra á móti banninu. Kalifornía er það ríki þar sem bannið skiptir hvað mestu máli en Pelosi er einmitt þignmaður þess fylkis.

Talið er að olíuborun við strendur Bandaríkjana sem og önnur mál tengd háu olíuverði verði mikilvæg í komandi forsetakosningum í nóvember.