Seðlabankinn hækkar stýrivexti í 18 prósent

Bankastjórn Seðlabanka Íslands hefur ákveðið að hækka stýrivexti um 6 prósentustig, úr tólf prósentum í 18. Þetta kemur fram í tilkynningu frá bankanum.

Þar kemur enn fremur fram að rökstuðningur fyrir ákvörðuninni verði birtur klukkan 11 á heimasíðu Seðlabankans. Fram hefur komið að Alþjóðagjaldeyrissjóðurinn, sem lána mun íslenskum stjórnvöldum fé, leggi áherslu á að hefta flæði fjármagns úr landinu og hefur vaxtahækkun verið nefnd sem leið til þess.

Vísir greindi frá því fyrir rúmri viku að tvö helstu skilyrði Alþjóðagjaldeyrissjóðsins í viðræðum við Íslendinga væru þau að krónunni yrði komið aftur á flot og að stýrivöxtum yrði haldið háum.