Palin og Biden á kurteisu nótunum í gær

Kappræður varaforsetaefnanna Söru Palin og Joe Biden í nótt þykja hafa verið á kurteisum og háttvísum nótum. Ýmislegt bar á góma í ræðuhöldunum, til dæmis brottflutningur bandarískra hermanna frá Írak og hin alltumlykjandi efnahagsmál sem hvíla eins og mara á Bandaríkjamönnum og heimsbyggðinni allri. Þá létu varaforsetaefnin ekki undir höfuð leggjast að skjóta föstum skotum hvort að hins forsetaefni.

Fox News birti í gær skoðanakönnun þar sem fram kom að almennt væri talið að Biden færi með sigur af hólmi í pontunni en fleiri hrifust hins vegar af Palin. Sams konar könnun sem CNN framkvæmdi eftir kappræðurnar staðfesti þetta í meginatriðum en áhorfendum þótti Palin þó standa fast á sínu og ekki gefa millimetra eftir.

Stjórnmálaskýrendur telja kappræðurnar í gær ekki breyta ýkjamiklu um baráttu McCains og Obama en sá síðarnefndi hefur sótt í sig veðrið síðustu vikur og náð undirtökunum í fimm lykilríkjum þar sem McCain átti áður meira fylgi að fagna.