Össur býður Birni Inga í Samfylkinguna

Össur Skarphéðinsson iðnaðarráðherra býður Birni Inga Hrafnssyni, borgarfulltrúa Framsóknarflokksins, að ganga til liðs við Samfylkinguna vegna þeirra deilna sem eru innan Framsóknarflokksins.

Í pistli sem Össur ritar á heimasíðu sína í kvöld fjallar hann um þau átök sem blossað hafa upp á milli Björns Inga og Guðjóns Ólafs Jónssonar, fyrrverandi þingmanns Framsóknarflokksins. Átökin má rekja til bréfs sem Guðjón Ólafur ritaði framsóknarmönnum í Reykjavík þar sem hann ýjaði að því að frambjóðendur flokksins fyrir borgarstjórnarkosningarnar árið 2006 hefðu fengið föt fyrir hundruð þúsunda á kostnað flokksins.

Í kjölfar þess lýsti Björn Ingi því yfir að hann íhugaði að hætta að starfa fyrir Framsókn. Guðjón Ólafur sagði svo í dag í Silfri Egils að hann væri með mörg hnífasett í bakinu eftir rýtingsstungur Björns Inga og að Björn Ingi hefði skilið eftir sig sviðna jörð í flokknum.

Össur segist hafa staðið í þeirri meiningu að Björn Ingi hefði bjargað Framsóknarflokknum tvisvar, fyrst með því að komast inn í borgarstjórn og svo með endurreisn sinni með því að slíta samstarfi við Sjálfstæðisflokkinn í borginni. ,,Nú sýnist mér að Framsókn sé að takast það sem Sjálfstæðisflokknum tókst ekki þrátt fyrir aðdáunarverða elju - að klína á hann drullu með þeim hætti að honum er varla lengur líft í svona aumum flokki," segir Össur.

 

Hann bætir við: ,,Í húsi Samfylkingarinnar eru margar vistarverur, og fyrir mína parta segi ég við Björn Inga: Sértu velkominn í mín hús - og taktu eins marga með þér og þú getur. Borgarfulltrúinn á nefnilega margt sameiginlegt með stefnu Samfylkingarinnar, og nægir að nefna stórmál einsog Evrópu og evru, fyrir utan margt annað. Samfylkingin á honum skuld að gjalda eftir að hann fleytti henni í úrslitastöðu í Borginni, og verður að taka vel á móti honum kjósi hann að gera alvöru úr því að axla sín skinn og leita uppi nýja förunauta einsog Rikki í Höfnum." Bætir Össur því svo við að Margrét Sverrisdóttir, fulltrúir Frjálslyndra og óháðra í borgarstjórn, eigi líka að ganga til liðs við Samfylkinguna.

 

,,Við erum vön að taka á móti fólki, og gerum það vel. Við höfum sjálf öll verið í hlutverki flóttafólks á einhverjum tíma ferils okkar, og vitum, hvernig á að rétta hjálpandi hönd þegar menn söðla um. En það er erfitt, og það þarf kjark. Hefur Björn Ingi og hans lið þann kjark? Það kemur í ljós," lýkur ráðherra pistli sínum.