Púsluðu sig inn í heimsmetabókina

Fimmtán þúsund púsláhugamenn hafa nú lokið við að púsla saman stærsta púsluspili heims sem vitaskuld er staðsett í Ravensburg í Þýskalandi, heimabyggð hins góðkunna púslframleiðanda Ravensburger AG.

Púsluspilið þekur eina 600 fermetra á torgi í miðbænum og telur 1.141.800 bita. Að sjálfsögðu er um heimsmet að ræða og fellur fyrra heimsmet í þessum efnum rækilega í skuggann af því en þar var um að ræða 212.000 bita spil sem raðað var saman í Singapore árið 2002.

Ekki voru allir púslararnir 15.000 þó saman komnir á torginu heldur var framkvæmdin sú að þeir púsluðu hver fyrir sig saman rúmlega 4.000 litlum 252 bita púsluspilum. Þau voru svo fest saman á torginu til að mynda heildarstykkið mikla. Íbúar Ravensburgar eru þekktir fyrir áráttukennda púslhegðun sína en þeim þykir fátt skemmtilegra en að fást við þrautir af því tagi.