Kreppan má ekki valda einangrun í þjóðarsálinni

Háskóli Íslands brautskráði um 450 kandídata í dag. Við athöfnina voru þeir Jónatan Þórmundsson og Sigurður Líndal, frá Lagadeild og Søren Langvad frá Verkfræðideild sæmdir heiðursdoktornafnbót.

Við athöfnina sagði Kristín Ingólfsdóttir rektor að það væri brýnt að Háskóli Íslands héldi fast við stefnu um afburðaárangur í menntun, vísindum og nýsköpun. Þannig gætu Íslendingar knúið samfélagið upp úr öldudal til nýrrar framfarasóknar.

Í ræðu sinni við brautskráninguna í dag sagði rektor Háskóla Íslands, að nú myndi Háskólinn leggja meiri þunga en nokkru sinni á nýsköpunarverkefni á öllum sviðum vísinda og fræða, þar yrðu hugvísindin ekki undan skilin. Kreppa í efnahagslífinu mætti ekki valda einangrun í þjóðarsálinni. „Við göngum sterkust til leiks á alþjóðlegum vettvangi ef okkar eigin menning er í senn sterk og opin," sagði Kristín.

Kristín sagði að fjölþætt menntun á sviði hugvísinda treysti stolt okkar og sjálfsöryggi vegna eigin menningar og þannig gætu hugvísindin stuðlað að skilningi á stöðu okkar í sambandi við aðrar þjóðir.