Slökkvilið tapar Hringrásarmáli í Hæstarétti

Hæstiréttur staðfesti í dag sýknudóm í máli slökkviliðs höfuðborgarsvæðisins á hendur endurvinnslufyrirtækinu Hringrás vegna mikils bruna á athafnasvæði Hringrásar í nóvember.

Slökkvilið krafði fyrirtækið um rúmar 25,6 milljónir króna. Málið snerist um það að slökkviliðinu gekk erfiðlega að ráða við eldinn og fékk því aðstoð frá fyrirtækinu E.T. sem er í nágrenni Hringrásar í Sundahöfn.

Vélar E. T. skemmdust í brunanum og þá þurfti að hreinsa til á lóð E.T. Fór því félagið fram á að vátryggingarfélag Hringrásar greiddi því skaðabætur. Því hafnaði vátryggingafélagið á þeim grundvelli að dekkjahrúgan sem björgunaraðgerðir E.T. hefðu einkum beinst að hefði verið ótryggð.

Í framhaldinu ákvað stjórn slökkviliðs höfuðborgarsvæðisins að greiða þennan kostnað E.T. en höfðaði jafnframt mál á hendur Hringrás til þess að fá kostnaðinnn endurgreiddan.

Í dómi Hæstaréttar sagði að E.T. ehf. hefði orðið fyrir tjóni vegna slökkvistarfsins. Samkvæmt lögum hefði félagið eignast kröfu á hendur slökkviliðinu vegna endurgjalds fyrir veitta þjónustu við slökkvistarfið og lagfæringar á eigin athafnasvæði í framhaldi af því.

Hins vegar hefði engum stoðum verið rennt undir þá staðhæfingu slökkviliðsins að Hringrás hefði valdið E.T. tjóni og að fyrirtækið hefði af þeim sökum eignast skaðabótakröfu á hendur Hringrás sem slökkviliðið hefði fengið framselda. Brast því lagagrundvöll fyrir kröfu slökkviliðs eins og hún var fram sett og varð því að sýkna Hringrás að mati Hæstaréttar.