Rannsókn lokið í húsbílahassmálinu

Rannsókn lögreglunnar á höfuðborgarsvæðinu á umfangsmiklu fíkniefnamáli sem kom upp á Seyðisfirði í júní er lokið og hefur það verið sent embætti ríkissaksóknara til meðferðar.

Tónleikahaldarinn Þorsteinn Kragh ásamt Hollendingi á áttræðisaldri hafa setið í gæsluvarðhaldi vegna málsins. Þeir voru fyrst úrskurðaðir í gæsluvarðhald á grundvelli rannsóknarhagsmuna en síðan vegna almannahagsmuna. Hollendingurinn aldraði var handtekinn í júní en Þorsteinn í júlí.

Rannsókn málsins var mjög viðamikil en að henni komu lögregluyfirvöld í fimm löndum og einnig Europol.

Í umræddu máli fannst mikið magn fíkniefna í sérútbúnum húsbíl sem kom til landsins með ferjunni Norrænu. Um var að ræða 190 kg af hassi, 1,6 kg af marijúana og 1,3 kg af kókaíni.