Fimmtungur ársneyslunnar náðist í Norrænu

Þórarinn Tyrfingsson, yfirlæknir á Vogi, segir að útreikningar SÁÁ geri ráð fyrir því að hassneysla á íslandi sé að lágmarki eitt tonn á ári. Það þýðir að hassið sem gert var upptækt í Norænu í dag sé nærri því einn fimmti af ársneyslu á efninu hér á landi.

Aðspurður hvaða áhrif þetta hafi á eiturlyfjamarkaðinn hér á landi segir Þórarinn að reynslan sýni að svona mál hafi furðulítil áhrif.

Verðið komi til með að hækka lítillega en það gangi til baka innan tíðar.

Eitt gramm af hassi kostar yfirleitt 2000 krónur um þessar mundir.

Þórarinn segir að neysla á hassi hafi náð ákveðnu hámarki fyrir fáeinum árum og virðist ekki ætla að aukast. Ekki hafi heldur dregið úr neyslunni heldur hafi hún verið stöðug undanfarin ár.

Þórarinn segist fagna því að Norrænusmyglið hafi komist upp. "Þetta sýnir að tollgæslan og lögregan eru að vinna vinnuna sína," segir hann.