Telur líklegt að enn fleiri höfði mál gegn olíufélögunum

„Já, það finnst mér," sagði Steinar Þór Guðgeirsson hæstaréttarlögmaður, inntur eftir því hvort honum finnist líklegt að fleiri muni bætast í hóp fólks sem hyggst höfða mál á hendur Keri hf., rekstraraðila N1, áður Esso, vegna tjóns af völdum ólöglegs verðsamráðs.

„Við hjá Lögfræðistofu Reykjavíkur erum með hundruð mála inni á borði hjá okkur. Við ákváðum að byrja á þessu máli [sem var dæmt í gær] en nú förum við á fullt með hin," sagði Steinar enn fremur.

Hann segir að fólk þurfi að hafa í höndunum kvittanir eða einhver gögn um bensínkaup og hvað greitt hafi verið fyrir lítrann til að sýna fram á tjón sitt. Hvert mál þarf að reka fyrir sig en Steinar segist ekki telja það útilokað að olíufélögin vilji semja til að losna við málarekstur gegn mörg hundruð manns.