„Nýtt tímabil óðaverðbólgu“

„Við höfum orðið vitni að vaxandi misskiptingu í samfélaginu og birtingarmyndirnar eru margar," sagði Georg Páll Skúlason, formaður Félags bókagerðarmanna, í ræðu sem hann hélt á Ingólfstorgi í dag, á hátíðisdegi verkalýðsins.

Georg sagði að verðbólga og slæmar horfur í efnahagslífinu hefðu gert ávinning nýundirritaðra kjarasamninga að engu og þegar væri ljóst að til endurskoðunar samninganna kæmi í byrjun næsta árs. „Stór hópur fólks á íslenskum vinnumarkaði þekkir ekki tveggja stafa verðbólgu. Við sem munum hvernig ástandið var hér á tímabili óðaverðbólgu, viljum ekki rifja það upp í verki.

Með nýjustu verðlagsmælingu er það staðfest, að við erum komin inn í nýtt tímabil óðaverðbólgu," sagði Georg.

Forðast óþægilega umræðu

Hann varpaði fram þeirri spurningu hvort krónan hefði fallið vegna einhvers sem gerst hefði í útlöndum og enn fremur hvort stjórnvöld og Seðlabankinn hefðu getað gert eitthvað til að koma í veg fyrir fall krónunnar. „Nei góðir félagar. Það er ekkert nýtt að valdhafar sem vilja forðast óþægilega umræðu um staðreyndir bregðist svona við. Halda því fram að ástandið sé afleiðing umræðunnar um ástandið. Það er auðvitað ekkert annað en fráleitt," sagði Georg.

Hann sagði verkalýðshreyfinguna hafa varað við því á undanförnum árum að þegar drægi úr þenslu í efnahagslífinu og á vinnumarkaði gæti lendingin orðið hörð. Stjórnvöldum hefði verið bent á hættumerkin en ráðamenn látið þau sem vind um eyrun þjóta. Afleiðingar þess upplifði þjóðin nú.

Georg lauk máli sínu með því að margt hefði áunnist í kjara- og réttindamálum launafólks. Nefndi hann ný jafnréttislög og ákvæði þeirra um afnám launaleyndar.

Klykkti hann út með þessum orðum: „Þess vegna komum við saman á fyrsta maí, ár eftir ár. Til að minna okkur á glæsta sigra og efla samstöðuna til að berjast fyrir nýjum. Hún er lykillinn að öllum okkar árangri. Félagar. Ég vil að lokum ítreka hamingjuóskir til ykkar í tilefni 1. maí. Munum að lykillinn að frekari árangri og landvinningum er hjá okkur sjálfum - fólginn í samstöðunni."