Sagði réttlátt samfélag kosta blóð, svita og tár

Árni Stefán Jónsson, formaður SFR - stéttarfélags í almannaþjónustu, sagði í ræðu sinni á Ingólfstorgi í dag, að það hefði kostað blóð, svita og tár að byggja upp réttlátt samfélag fyrir alla landsmenn. Launafólk hefði aldrei fengið neitt á silfurfati og alls ekki væri sjálfgefið að allir ættu jafnan aðgang að heilbrigðisþjónustu, menntun og annarri velferðarþjónustu.

Árni sagði enn fremur að nú væri búið að telja þjóðinni trú um að ásættanlegt sé að himinn og haf skilji almenning frá ofurlaunaaðlinum og að stjarnfræðileg auðsöfnun eigi sér stað hjá litlum hluta þjóðarinnar meðan aðrir berjast í bökkum. Hann sagði það ekki ásættanlegt að launataxtar gætu verið 120 þúsund krónur á mánuði á meðan ofurlaunaaðallinn hefði fimm milljónir í mánaðarlaun.

Ástandið í efnahagslífinu var einnig meðal yrkisefna Árna og sagði hann harða lendingu þar fyrst og fremst bitna á almenningi. Horfurnar væru ekki góðar, bankar hefðu skrúfað fyrir lánafyrirgreiðslu, atvinnuleysisvofan væri í leynum bak við næsta horn og Seðlabankinn spáði svo miklu verðfalli fasteigna að mikið skuldsettar eignir stæðu ekki lengur undir lánum.

Árni gagnrýndi núverandi ríkisstjórn fyrir að gera ekkert til að milda það högg sem almenningur yrði fyrir. Í stað þess væru forystumenn hennar á stöðugum ferðalögum út og suður. Slík framkoma væri til þess fallin að grafa undan trú á að stjórnvöld réðu við ástandið.

Árni ræddi því næst um kjarasamninga og sagði að lítið gleðiefni væri að ganga til þeirra við núverandi aðstæður. Hann lauk ræðu sinni með því að stappa stálinu í viðstadda með þessum orðum: „Þótt hér hafi verið dregin upp dökk mynd af ástandinu þá vitum við að með sameiginlegu átaki getum við unnið okkur út úr því og haldið áfram á þeirri braut sem frumherjarnir mótuðu - við getum þróað íslenska velferðarkerfið enn frekar þannig að enginn þurfi að líða skort í þessu landi."