Vilhelm Þorsteinsson að slá botninn í síldarvertíðina

Áhöfnin á fjölveiðiskipinu Vilhelm Þorsteinssyni EA er þessa stundina að slá botninn í síldarvertíðina, sem kennd er við sumargotssíld.

Fyrir stundu var skipið að taka síðasta kastið á Kiðeyjarsundi, austan við Grundarfjörð. Öll önnur skip eru búin að klára kvóta sína en heildarkvótinn var 153 þúsund tonn.

Það sem gerir þessa vertíð óvenjulega er að megnið af aflanum veiddist á Grundarfirði og í Kiðeyjarsundi og þar virðist enn vera óþrjótandi síld að sögn sjómanna. Talsvert af aflanum var fryst um borð í skipum en annars var siglt með aflann til vinnslu á Austfjörðum eða í Vestmannaeyjum.