Fjórðungi fleiri hafa heimsótt Viðey í ár en í fyrra

Ríflega fjórðungi fleiri heimsóttu Viðey á fyrstu átta mánuðum þessa árs en á sama tíma í fyrra. Verkefnastjóri fyrir eyna er hæstánægður og segir nóg um að vera á næstu vikum.

Athygli var vakin á hinni góðu aðsókn á fundi menningar- og ferðamálaráðs borgarinnar nýverið. Samkvæmt samantekt sóttu rúmlega 14.200 manns eyna á fyrstu átta mánuðum ársins en þeir voru um 10.500 í fyrra.

Aðspurð segist Guðlaug Elísabet Ólafsdóttir, verkefnastjóri fyrir Viðey, margar skýringar geta verið á aukinni aðsókn. „Það var einstaklega gott veður í sumar og fleiri kusu að eyða sumarfríinu heima en í útlöndum og litu kannski til náttúrunnar í nágrenni borgarinnar. Það er mjög ánægjulegt hvað aðsóknin hefur aukist mikið, sér í lagi hversu margar fjölskyldur hafa komið í eyna í sumar til að eiga góða stund saman," segir Guðlaug.

Siglt er daglega út í eyna yfir sumartímann en þann 1. október tekur vetraráætlun við og þá er farið á laugardögum og sunnudgögum. „Þannig að fólk getur áfram heimsótt eyna og farið í rómantísktar haustgöngur," segir Guðlaug.

Það stendur mikið til á næstunni enda er ætlunin að kveikja aftur á friðarsúlu Yoko Ono í Viðey. Það verður gert á fæðingardegi eiginmanns hennar, Johns Lennon, þann 9. október. „Hún kemur hingað til lands og veitir viðurkenningu úr friðarsjóði sínum og Lennons og það verður nóg um að vera í eynni í tengslum við það," segir Guðlaug og bætir við að verið sé að leggja lokahönd á skipulagningu dagsins.

Reykvíkingar og fleiri geta þó tekið forskot á sæluna því næstu fimmtudagskvöld verða haldnir tónleikar í eynni í aðdraganda þess að kveikt verður á friðarsúlunni. Sigurður Flosason og Gunnar Gunnarsson ríða á vaðið á morgun með friðartónleikum í Viðeyjarkirkju. Tónleikarnir hefjast allir klukkan 20.30 og verður siglt frá Skarfabakka til Viðeyjar kl.19.45.„Ef vel gengur gæti þetta orðið fastur liður á fimmtudagskvöldum í vetur," segir Guðlaug og bendir á að tónleikarnir séu kærkomið tækifæri til þess að kúpla sig út úr hversdagslífinu og vera minntur á ástina og kærleikann.

Það vakti töluverða athygli þegar Guðlaug tók að sér starf verkefnisstjóra í Viðey enda hafði hún getið sér gott orð á leiksviðinu. „Þetta hefur verið alveg frábært og með hverjum deginum sem líður kemur það betur í ljós að þetta var hárrétt ákvörðun hjá mér. Það var kærkomið tækifæri að taka sér hvíld frá hinu," segir Guðlaug sem þó hefur ekki sagt skilið við leiklistina. Landsmenn munu berja hana augum í fyrstu íslensku hrollvekjunni, The Reykjavik Whale Watching Massacre, sem frumsýnd verður á næsta ári.