Framsókn tókst það sem Sjálfstæðisflokknum tókst ekki

Össur Skarphéðinsson iðnaðarráðherra segir að Framsókn hafi tekist það sem Sjálfstæðisflokknum í borginni tókst ekki, að kasta nógu miklum skít á Björn Ingi Hrafnsson þannig að hann hverfi úr pólitík. Hann á þó von á að Björn Ingi komi aftur inn á vettvang stjórnmálanna.

Össur segir ákvörðun Björns Inga skiljanlega og að það þurfi mjög öfluga og þykkskinna menn til að standa af sér langvinnar persónulegar árásir. „Við þær aðstæður koma inn þættir, sem stjórnmálamenn þurfa endranær ekki að hafa áhyggjur af - líðan fjölskyldu þess sem siglir pólitíska brotsjói.. Við, sem höfum siglt gegnum brim í stjórnmálum og hörð átök, þekkjum hversu það er erfitt að halda börnum frá því að lesa og heyra það versta sem við þær aðstæður getur beinst persónulega að manni," segir Össur.

Össur segir Björn Inga hafa verið einn af örfáum stjórnmálamönnum innan Framsóknar sem hafi haft burði til að axla forystuhlutverk til framtíðar og spyr hvort aðrir kandídatar hafi efnt til aðfararinnar. „Hitt hef ég fundið lengi, að yngra liðið í flokknum hefur borið glóðir elds að höfði hans, og séð ofsjónum yfir því kastljósi sem hefur beinst að Birni Inga sem leiðtogaefni. Þau höfðu erindi sem erfiði - en uppskera í staðinn flokk, sem veikist enn frekar, og er nú orðinn helsjúkur. Smáflokkur á niðurleið, sem lendir í svona subbulegum átökum, á sér varla viðreisnar von," segir Össur.

Össur bendir ár að Björn Ingi hafi verið í hópnum í kringum Halldór Ásgrímsson, fyrrverandi forsætisráðherra, og uppgjör flokksins við hann sé enn í gangi „og andskotar armsins hafa lengi beðið eftir því að geta leitt Björn Inga undir höggið. Nú er það orðið. Ég á þó ekki von á því að dagar Björns Inga í stjórnmálum séu taldir. Það kann hins vegar að líða tími þangað til hann drepur aftur fæti á hinn pólitíska vang. Ég vona hins vegar að hann eigi afturkvæmt með einhverjum hætti - og læri þá af reynslunni," segir Össur.

Hann lýkur pistli sínum á annarri líkingu við söguna af Birni ríka: „Þegar Björn ríki var drepinn af enskum magnaði Ólöf ríka slíkan byl á hendur drápsmönnum hans, að þrjátíu skip fórust. Nú er að sjá hvort brestur á með Ólafarbyl í Framsóknarflokknum, og hvort flokksskútan lifir hann af?"