Anna Kristinsdóttir, fyrrverandi borgarfulltrúi Framsóknarflokksins, segir Guðna Ágústsson, formann flokksins, vel vita um hvað deilur Björns Inga Hrafnssonar, borgarfulltrúa flokksins, og Guðjóns Ólafs Jónssonar, fyrrverandi þingmanns, snúast um. Hún sakar forystumenn flokksins um að stinga höfðinu í sandinn.
Anna fjallar um átökin í Framsóknarflokknum á heimasíðu sinni og spyr hvenær átök verði persónuleg og hvenær þau verði víðtækari. Vísar hún þar til orða formanns Framsóknarflokksins, Guðna Ágústssonar, í fréttum í gær en þar sagði Guðni að um persónuleg átök Björns Inga og Guðjóns Ólafs væri að ræða.
Ekki vært í flokknum vegna átaka
,,Þegar ég valdi að stíga frá borði úr Framsóknarskútunni hafði ég séð á bak fjölda vina og félaga sem töldu sér ekki vært lengur í félagsstarfinu vegna átaka. Þar voru m.a. nokkrir stjórnarmenn úr félögunum í Reykjavík," segir Anna og bætir við: ,,Strútarnir velja að stinga hausnum í sandinn þegar vandi steðjar að. Það er ekki vænlegt til árangur fyrir forystumenn í stjórnmálaflokki að taka upp slík vinnubrögð. Guðni veit vel um hvað málið snýst."
