Markús Örn í Þjóðmenningarhúsið

Markús Örn Antonsson, fyrrverandi borgarstjóri og útvarpsstjóri, hefur verið skipaður forstöðumaður Þjóðmenningarhússins frá og með 1. september næstkomandi.

Fram kemur í tilkynningu frá forsætisráðuneytinu að Markús leysi Guðríði Sigurðardóttur af hólmi en hún hættir að eigin ósk. Markús hefur verið sendiherra Íslands í Kanada frá því síðla árs 2005 en hann var skipaður sendirherra í utanríkisráðherratíð Davíðs Oddssonar.

Áður var hann útvarpsstjóri á árunum 1985-1991 og svo aftur 1998-2005 en í millitíðinni var hann borgarstjóri Reykjavíkur. Þar sem Guðríður Sigurðardóttir hættir sem forstöðumaður Þjóðmenningarhúss 1. maí mun Guðrún Garðarsdóttir skrifstofustjóri gegna starfi forstöðumanns til 1. september þegar Markús Örn tekur við.