Neita að hafa barið löggur

„Ég man eftir því að þarna voru einhver læti en ég sá lítið,“ sagði félagi Litháanna þriggja fyrir dómi sem ákærðir eru fyrir að hafa ráðist á fjóra lögreglumenn aðfaranótt 11. janúar með höggum og spörkum. Litháarnir gerðu allir lítið úr málinu og neituðu sök sem fram kemur í ákæru.

Lögreglumennirnir eru í götuhópi fíkniefnadeildarinnar og voru að störfum við eftirlit þegar ráðist var á þá fyrir utan barinn Monte Carlo um eitt að nóttu, samkvæmt ákæru.

Ákærðu neita að hafa vitað að mennirnir hafi verið lögreglumenn og sögðust hafa verið að verja stúlku sem lögreglumennirnir voru að hafa afskipti vegna gruns um fíkniefnanotkun. Lögreglumennirnir voru óeinkennisklæddir. Sögðust ákærðu í mesta falli hafa ýtt aðeins við lögreglumönnunum en ekki hafa ráðist á þá.

Himinn og haf var á milli vitnisburðar lögreglumannanna sem urðu fyrir árásinni og ákærðu. „Við kölluðum skýrt lögreglan og police,“ sagði einn lögreglumannanna, sem vankaðist eftir högg frá einum hinna ákærðu.

Stúlka sem varð vitni að árásinni sagði við skýrslutöku hjá lögreglu að högg eins ákærða hefði verið „áberandi fast“ og minnt á rothögg í boxi. „Ég get ekki staðhæft um skynjun annarra,“ sagði einn lögreglumannanna þegar hann útskýrði að einn ákærðu gæti varla hafa annað en tekið eftir því að þeir væru lögreglumenn. „Ég var með lögregluskilríki um hálsinn og sýndi þau,“ sagði lögreglumaðurinn. Lögmaðurinn sem hafði ýjað að því að misræmi væri í vitnisburði lögreglumannsins frá því skýrsla var tekin af honum hætti snögglega að spyrja um málið eftir þetta. „Þetta segir allt sem segja þarf,“ sagði Arngrímur Ísberg dómari þá.

Einn ákærðu barði tvo lögreglumenn niður með þungum hnefahöggum, samkvæmt vitnisburði lögreglumannanna. Annar lögreglumannanna fékk högg á gagnaugað og vankaðist við það en félagi mannsins sem stóð skammt frá honum fékk högg á kinnina. Bæði höggin voru mjög þung og voru lögreglumennirnir með höfuðverk marga daga á eftir. „Þetta var töluvert sjokk,“ sagði einn lögreglumannanna um árásina. Lögreglumennirnir beittu kylfum og táragasi þegar þeir voru að yfirbuga mennina. Hjálp kom frá lögreglu skömmu síðar en mikill viðbúnaður var af hálfu lögreglunnar.

Einn lögreglumannanna sagði mikinn ótta hafa skapast hjá fjölskyldu sinni eftir árásina og hann hefði sjálfur verið í áfalli. Lögreglumennirnir fengu áfallahjálp eftir árásina.